Футзал бўйича Ўзбекистон миллий терма жамоаси Испаниядаги ўқув-машғулот йиғинлари доирасида ўзининг учинчи назорат учрашувини ўтказди. Бу сафар Хосе Мария Мендез шогирдларига қарши Испания Олий дивизиони вакили – «Карнисер» клубига қарши майдонга тушди.
 
Муросасиз баҳсда испанлар Ўзбекистон терма жамоаси футзалчилари устидан 4:2 ҳисобида ғалаба қозонишга муваффақ бўлишди. Ўзбекистонликлар томонидан «Карнисер» дарвозасига урилган голларга Нодир Элибоев ва Мақсад Файзуллаев муаллифлик қилишди.
 
Қайд этиш жоиз, аввалги икки учрашувнинг дастлабкисида Ўзбекистон терма жамоаси «Баргас» клубига 1:4 ҳисобида имкониятни бой берган, сўнгра, «Гвадалахара» устидан 5:3 ҳисобида ғалаба қозонган эди.
 
Эслатиб ўтамиз, Ўзбекистон футзал терма жамоаси 22 майга қадар Испанияда бўлади. Шундан сўнг, 25 май – 2 июнь кунлари БААда бўлиб ўтадиган футзал бўйича Осиё Чемпионати финал қисмида иштирок этиш учун Мадриддан Дубайга жўнаб кетади.
 
Ўртоқлик учрашуви
«КАРНИСЕР» (ИСПАНИЯ) – ЎЗБЕКИСТОН 4:2
Голлар: Нодир Элибоев (17), Мақсад Файзуллаев (20).
ЎЗБЕКИСТОН (бошланғич бешлик): Рустам Умаров (дарвозабон), Шуҳрат Тожибоев, Фарҳод Абдумавлонов, Дилшод Раҳматов, Нодир Элибоев.