"Банияс" ва "Пахтакор" жамоалар ўртасидаги учрашувдан кейин сербиялик мураббий қуйидаги фикрларни таъкидлаб ўтди.
   
Деян Журжевич: – Мезбонларни ғалабага эришиб, кейинги раундга йўлланма олганлари билан табриклайман. Биз эса Чемпионлар лигасида баъзи муаммолар сабабли ўзимиз истаган натижага эриша олмадик. Чунки ОЧЛнинг савияси анча баланд. Бугунги учрашувнинг қийин ўтишини билгандим. Бундай баҳсларда кўп имкониятлар юзага келмайди. Мезбонлар ўйин бошидаёқ ҳисобни очишди. Кейин бизда вазиятлар содир бўлди, аммо улардан фойдалана олмадик. Футболда сен урмасанг, сенга уришади. Худди шундай ҳолат биз билан содир бўлди. Умид қиламанки, шу жамоадаги футболчилар ёрдамида келаси мавсумда ОЧЛда ижобий натижаларга эришиш мумкин. Натижадан хафаман, албатта, лекин, жамоанинг ўсиб бораётганидан хурсандман. Биз иккинчи бўлимда фаолроқ ўйнадик. Чунки ҳолатни ўзгартиришимиз талаб этиларди. Бундай ҳавода 90 дақиқа мобайнида ҳужумкор ва прессингга асосланган футбол намойиш қилишнинг имконияти йўқ. Шу сабабли биринчи тайм бошида тўпни ўзимизда кўпроқ ушлаб туришга ҳаракат қилдик.