Тошкентнинг “Нефтгазмонтаж” футбол жамоаси Биринчи лигадаги фаолиятини тўхтатди. Клуб бу ҳақда 18 май куни расман мурожаат қилди.
Бунга сабаб сифатида молиявий муаммолар кўрсатилди. Жамоанинг сафар учрашувлари ҳамда ўйинларни ташкил этиш билан боғлиқ ҳаражатларга маблағ мавжуд эмас.
“Нефтгазмонтаж” биринчиликнинг 6-туридан ўрин олган “Андижон II” жамоасига қарши сафар ўйинида қатнаша олмаган ва техник мағлубиятга лойиқ кўрилганди. Жамоанинг жорий мавсумдаги натижалари билан қуйидаги ҳавола ёрдамида, ўтган мавсумдаги натижалари билан эса мана бу ерда танишиб олиш имконияти мавжуд.
Маълумот учун, “Нефтгазмонтаж” футбол жамоаси Нефтгазмонтаж МЧЖ таркибидаги тузилма сифатида 2021 йилги мавсумда ЎзПФЛ рўйхатидан ўтказилганди. Уставимиздан келиб чиқиб, қатнашчи Биринчи лига мусобақасидан четлаштирилса, у шунингдек лига қатнашчилари сафидан ҳам чиқарилади.
“2022 йилги мавсумда Ўзбекистон Профессионал футбол лигаси томонидан ўтказиладиган мусобаqалар регламенти”нинг 6.9-банди асосида “Нефтгазмонтаж” жамоасининг жорий мавсумдаги барча натижалари бекор қилинади ва турнир жадвали шу асосда қайта шакллантирилади. Жамоа футболчилари бошқа жамоалар билан шартнома имзоласа, мазкур шартномалар ЎзПФЛ рўйхатидан трансфер ойнасига қадар ҳам ўтказиб берилади. Бироқ футболчилар лицензияси трансфер ойнаси очиладиган 4 июль санасидан бошлаб берилади.
