Ўтган дам олиш кунлари Англия чемпионати якунига етди. 2021/2022 йилги мавсум якунида Whoscored портали Премьер-лиганинг энг яхши футболчиларидан иборат рамзий терма жамоани ташкил қилишди.
Эътиборлиси, "Манчестер Юнайтед" юлдузи Криштиану Роналду кучли 11 талик рўйхатига киритилмаган.
“Манчестер Сити” ярим ҳимоячиси Кевин де Брюйне 7,6 балл билан мавсумнинг энг яхшиси деб топилди. Ундан ташқари “шаҳарликлар”дан ҳимоячи Жоау Канселу ва ярим ҳимоячи Родри ўрин олган.
Аксарият футболчилар “Ливерпуль” вакиллари ҳисобланишади. Рамзий терма жамоадан дарвозабон Алиссон, ҳимоячилар Трент Александр-Арнолд, Жоэль Матип, Виржил ван Дейк, ҳужумчилар Муҳаммад Салоҳ ва Садио Манелар жой олган.
Қолган икки ўрин “Тоттенхэм” ҳужумчилари Сон Хён Мин ва Харри Кейнга насиб этди.
