Бироз ўтиб, Уэмблида «Ҳаддерсфилд» ва «Ноттингем Форест» ўртасида Чемпионшип плей-офф ўйини бўлиб ўтади ва ғолиб келаси мавсумда АПЛда ўйнаш ҳуқуқига эга бўлади.
Айнан шу ўйин, яъни Чемпионшип плей-оффи молиявий нуқтаи назардан дунёдаги энг қимматбаҳо учрашув сифатида баҳоланади. Жаҳон чемпионати ёки ЕЧЛ финаллари ғолибга мағлубдан 5-10 миллион тақдим этиши мумкин, аммо бу ўйинга камида 100 миллион фунт тикилган, деб ҳисоблаб берганди Daloitte компанияси бухгалтерлари.
Қандай? Биринчидан, ушбу ўйин ғолиб келаси мавсум АПЛда ўйнайди - бу дегани бир йиллик транслация ҳуқуқлари даромадидан Лига ҳар бир клубга камида 85 миллион фунт беради. Агар АПЛдаги илк мавсумда жамоа ўз жойини сақлаб қолса, кейинги мавсумгаям шунча маблағни ҳисоблаб олаверинг.
Мабодо клуб бир йилдаёқ АПЛни тарк этса ҳам қуруқ қолмайди. Бундай клублар учун «Олтин парашют» системаси ўйлаб топилган. Маълумки, бирданига АПЛни тарк этган клуб катта молиявий йўқотишга учрайди, турли молиявий шартномалар, транслация ва бошқа даромадлари кескин пасаяди. Бу эса, ҳатто клубни инқирозга учратиши мумкин. Шуни эътиборга олган ҳолда, Лига АПЛни тарк этган ҳар бир клубга тахминан 25-30 миллион фунт беради. Маблағлар уч йил давомида бўлиб-бўлиб қайтарилади. Агар клуб шу даврда АПЛга қайтса, қолган қисми берилмайди.
Хуллас, биргина мана шу учрашувдаги ғалаба клубга йўқ деганда 100 миллион фунт олиб келади.
Қизиғи, яна бир анъана шаклланган экан. Плей-офф мағлуби катта даромаддан қуруқ қолганидан кўп хафа бўлмасин деб, финалчилар олдиндан келишиб олишаркан - ғолиб АПЛ йўлланмасини қўлга киритади, мағлубга эса, бугунги ўйин чипталаридан тушадиган даромаднинг ҳаммаси насиб қилар экан.
