Алексей Евстафеев мураббийлигидаги Ўзбекистон (U22) терма жамоаси 28 май куни Непал пойтахти Катманду шаҳрига жўнаб кетиши керак эди. Мамлакатда юзага келган сиёсий вазият туфайли мазкур сафар бироз кейинроққа қолдирилди.

Сир эмаски, 22 ёшгача бўлган футболчилар ўртасидаги Осиё чемпионатининг саралаш турнири илк марта ташкил этилмоқда. Бунга қадар ОФК фақатгина ўсмирлар (U16) ва ёшлар (U19) ўртасидаги Осиё чемпионатларини ўтказиб келарди. Ҳар икки йилда бир марта бўлиб ўтадиган Осиё чемпионати (U22) олимпиада йўлланмаси учун ўтказиладиган саралаш турнирларига ҳам барҳам бериши кўзда тутилган.

Аслида 2013 йилда бўлиб ўтиши режалаштирилган Осиё чемпионати (U22) 2014 йилнинг 11-26 январь кунлари ўтказилади. ОФК саралаш турнири учун аллақачон қуръа ташлаган бўлсада, қитъа чемпионатининг финал раунди бўлиб ўтадиган мамлакат номига аниқлик киритмаган.

Қуръага кўра Алексей Евстафеев бошқарувидаги Ўзбекистон (U22) терма жамоаси саралашнинг «D» гуруҳидан жой олган. Непалда бўлиб ўтиши режалаштирилган саралаш турнирида Ўзбекистонга мезбонлардан ташқари Яман, Иордания ва Бангладеш термалари ҳам рақобатчилик қилишади.

Дастлаб саралаш турнири қолган гуруҳлар каби 23 июнь – 3 июль кунлари бўлиб ўтиши керак эди. Бироқ кейинчалик Ўзбекистон жой олган гуруҳ беллашувлари бироз олдинроққа, аниқроғи, 2-10 июнь кунларига тайин қилинди. Ўзбекистон футбол федерацияси делегацияси Катмандуга йўл олиш арафасида турган бир пайтда, саралаш турнири бошқа санага кўчирилгани ҳақида ОФКдан маълумот келиб тушди. Мактубда навбатдаги сана аниқ кўрсатилмаган.

Шунингдек, саралашнинг «Е» гуруҳи ўйинларига назоратчи этиб Ўзбекистон футбол федерацияси вакили Фарход Абдуллаев тайин қилинганди. ОФК тақдим этган хатга кўра, мазкур гуруҳ ўйинларига ҳам ўзгартириш киритилган. Австралия, Япония, Индонезия, Сингапур, Маккао, Шарқий Тимор каби мамлакатлар иштирок этадиган гуруҳ ўйинлари 5-15 июль кунлари Индонезияда бўлиб ўтади.