Футзал бўйича шу пайтгача 11 марта ўтказилган футзал бўйича Осиё чемпионатида 10 марта Эрон терма жамоаси чемпионликни қўлга киритганидан хабарингиз бор. Форслар қитъа чемпионатлари тарихида иккинчи маротаба чемпионликни нишонламайдиган бўлдилар. Бугун бўлиб ўтган дастлабки ярим финалда Таиланд терма жамоаси Эронни сенсацион тарзда мағлубиятга учратди.

Ўйин давомида Саноий шогирдлари 2:0, 3:1 ҳисобида олдинда бордилар. Аммо тай футзалчилари ўйин сўнгига қадар ҳисобни тенглаштиришга муваффақ бўлдилар — 3:3.

Ўйинни бошқариб борган австралиялик бош ҳакам жамоаларни ҳар бири 5 дақиқадан иборат 2та қўшимча бўлимларга таклиф қилди. Унинг биринчисида таиландликлар битта тўп киритишди. Иккинчи қўшимча тайм тугашига 2 дақиқа қолганида эронликлар ҳисобни тенглаштиришди.

Асосий вақтнинг иккинчи бўлимида ишланган фоллар қўшимча таймларга ўтишидан хабарингиз бор. Ҳисобни тенглаштирган Воҳид Шамсаий рақибига нисбатан қўполлик ишлатиб, жамоаси дарвозасига дабл-пенальти белгиланишига сабаб бўлди. Аммо жануби-шарқий осиёликлар бу имкониятдан фойдалана олишмади. Эронлик дарвозабон тўпни майдон ташқарисига чиқариб юборди. Айнан шу бурчак тўпидан кейин таиландликлар ғалаба тўпини киритишди — 5:4.

Бу пайтда ўйин тугашига 1 дақиқадан кам вақт қолганди. Эронликлар бешинчи ўйинчи билан ҳаракат қилишларига қарамай, ҳисобни тенглаштиришга улгуришмади. Аксинча, тайландликлар бироз аниқроқ ҳаракат қилишганида олтинчи тўпни ҳам киритишлари мумкин эди.

Шу тариқа Эрон Осиё чемпионатлари тарихида иккинчи марта ярим финалда тўхтайдиган бўлди. Бу эса Эрон учун ўта қониқарсиз натижадир.

ОСИЁ ЧЕМПИОНАТИ. ЯРИМ ФИНАЛ
ТАИЛАНД - ЭРОН - 5:4. Асосий вақт - 3:3