Халқаро футбол федерацияси (ФИФА) 2022 йилда Қатарда бўлиб ўтадиган жаҳон чемпионатида ўйиндан ташқари ҳолатни аниқлашнинг ярим автоматик тизимидан фойдаланишини эълон қилди.
ФИФА расмий сайти хабарига кўра, стадион томи остига ўрнатилган 12 та махсус камералар тўпнинг ҳолатини ва ҳар бир футболчининг танасидаги 29 нуқтани, шу жумладан, офсайд бўлиши мумкин бўлган тананинг барча қисмларини кузатиб боради.
Турнирда фойдаланиладиган тўплар ичига махсус сенсор ўрнатилади. Янги технология туфайли видеоёрдамчи ҳакамлар ўйинчи жамоадоши узатмаси вақтида ўйиндан ташқари ҳолатда эканлиги ҳақида автоматик равишда билдиришнома олади.
Шундан сўнг, ВАР вазиятни қўлда текширади ва вазият ҳақида бош ҳакамга хабар беради. Қарор тасдиқлангач, стадионда ва трансляцияда офсайд ҳолати акс этган 3D анимация намойиш этилади.
Қайд этилишича, янги офсайдни аниқлаш жараёни бир неча сония давом этади.
