Италиялик ярим ҳимоячи Николо Дзаньоло "Рома"ни тарк этиш ҳақидаги фикрини ўзгартирди, деб хабар бермоқда Sport Mediaset.
Манбанинг ёзишича, ярим ҳимоячининг бундай қарорга келишига жамоа бош мураббийи Жозе Моуриньо билан бўлган суҳбат таъсир қилган. Португалиялик мутахассис тўғри сўз топди ва футболчини Италия пойтахтида қолишга ишонтирди.
Сўнгги бир неча ой ичида Дзаньоло Туриннинг "Ювентус" клубига ўтиши мумкинлиги ҳақида хабарлар тарқалган эди. «Кекса синьора» футболчи учун 50 миллион евро тўлашга тайёр бўлгани айтилганди.
Николо ўтган мавсумда А Серияда 28 та ўйинда майдонга тушиб, 2 та гол урди ва 2 та голли узатмани амалга оширди. Унинг клуб билан шартномаси 2024 йилнинг ўрталарига қадар мўлжалланган.
