“Бунёдкор” – “Шўртан” учрашувининг танаффус пайтида Украинада ўтган халқаро турнирда ғолиб чиқишган “Бунёдкор” футбол мактаби тарбияланувчиларининг тақдирлаш маросими бўлиб ўтди.

Аввал хабар бериб ўтганимиздек, Сергей Чигодаев бош мураббийлигидаги 2002 йилда таваллуд топган футбол мактабимиз тарбияланувчилари Алушта шаҳрининг 110 йиллигига бағишлаб ўтказилган халқаро турнир ғолиби бўлган эдилар.

“Жар” стадионига йиғилган мухлислар ўсмир “қалдирғочлар”ни илиқ қарши олишди. Ўзбек футболи фахрийси Ахбор Имомхўжаев, “Бунёдкор” ҳамда олимпия ва терма жамоаларимиз посбони Акбар Тўраев ғолибларга олтин меддаллар, қимматбаҳо совғалар, шунингдек маҳсус совринларни топширишди. Жамоа сардори Абдурауф Бўриев “Хизмат кўрсатган ёшлар мураббийи”, Республика тоифасидаги ҳакам, афсонавий спорт шарҳловчиси Ахбор Имомхўжаевдан турнирнинг бош соврини – чемпионлик кубогини қабул қилиб олди.

Дарвоқе, тенгқурларини қутлаш учун шу куни Жўра Хоназаров номидаги Тошкент вилояти Янгийўл футбол мактаби тарбияланувчилари ҳам “Жар” стадионига ташриф буюришди.