Хабар берилганидек, “Металлург” футбол клуби қошида фаолият юритаётган “El Golazo Academy Powered by Real Madrid Foundation” болалар ва ўсмирлар футбол академиясининг энг илғор тарбияланувчилари айни пайтда Испания сафарида бўлиб туришибди. Йиллик режага биноан биринчи мавсум якунига кўра 50 нафар ўқувчи Пириней оролига – “Қироллик клуби” футбол академиясида машғулот ўташ, маҳоратларини ошириш ҳамда тажриба алмашиш учун олиб кетилган.

Сафарнинг биринчи ва иккинчи кунлари академиямиз тарбияланувчилари “Реал” (Мадрид) футбол академияси билан яқиндан танишишди. Академия тарбияланувчиларига яратиб берилган шарт шароитларни кўздан кечиришди. Ўзлари ҳам уларнинг ётоқхонасида истиқомат қилишмоқда ва биргаликда шуғулланишяпти. Эътиборга молик жиҳати бекободлик ёшлар янги манзилга жуда тез мослашишди. Учинчи кунданоқ кўрик назорат учрашувларини ўтказишга киришишди. Жумладан, “Металлург U-17” жамоамиз “Ла Манча” клубидаги тенгдошларини 5:0 ҳисобида доғда қолдиришди. “Металлург U-12” жамоамиз эса “Реал” (Мадрид) жамоасидаги тенгдошлари билан муросага имзо чекишди – 1:1.