Xabar berilganidek, “Metallurg” futbol klubi qoshida faoliyat yuritayotgan “El Golazo Academy Powered by Real Madrid Foundation” bolalar va o‘smirlar futbol akademiyasining eng ilg‘or tarbiyalanuvchilari ayni paytda Ispaniya safarida bo‘lib turishibdi. Yillik rejaga binoan birinchi mavsum yakuniga ko‘ra 50 nafar o‘quvchi Piriney oroliga – “Qirollik klubi” futbol akademiyasida mashg‘ulot o‘tash, mahoratlarini oshirish hamda tajriba almashish uchun olib ketilgan.

Safarning birinchi va ikkinchi kunlari akademiyamiz tarbiyalanuvchilari “Real” (Madrid) futbol akademiyasi bilan yaqindan tanishishdi. Akademiya tarbiyalanuvchilariga yaratib berilgan shart sharoitlarni ko‘zdan kechirishdi. O‘zlari ham ularning yotoqxonasida istiqomat qilishmoqda va birgalikda shug‘ullanishyapti. E’tiborga molik jihati bekobodlik yoshlar yangi manzilga juda tez moslashishdi. Uchinchi kundanoq ko‘rik nazorat uchrashuvlarini o‘tkazishga kirishishdi. Jumladan, “Metallurg U-17” jamoamiz “La Mancha” klubidagi tengdoshlarini 5:0 hisobida dog‘da qoldirishdi. “Metallurg U-12” jamoamiz esa “Real” (Madrid) jamoasidagi tengdoshlari bilan murosaga imzo chekishdi – 1:1.