16 июнь, шанба куни Тошкентнинг "Пахтакор" жамоаси Ғузорда "Шўртан" меҳмони бўлади.

Ғузорликлар мавсум олдидан жамоани бошқариш учун белоруссиялик мутахассис Игорь Криушенкони таклиф қилишганди. Ҳозирча ушбу мураббий қайд этаётган натижалар жуда ҳам яхши эмас. Шу сабабли "Пахтакор"га қарши учрашувда Криушенко ўзини кўрсатиш учун ҳар қачонгидан кўпроқ меҳнат қилиши табиий. Ғузорда кечадиган беллашув турнинг марказий ўйинларидан бири сифатида қаралмоқда.

11 июнь куни "Пахтакор" "Нефтчи"дан 1:3 ҳисобида енгилган бўлса, ғузорликлар Ўзбекистон Кубогининг нимчорак финал биринчи учрашувида "Бунёдкор"га мағлуб бўлишди - 0:2.

Ҳозирга қадар "Пахтакор" "Шўртан" билан олий лига доирасида 14 марта тўқнаш келиб, уларнинг барчасида ғалаба қозонган! Рақиб дарвозасини 44 бор аниқ нишонга олган жамоамиз фақат 5 бор ўз дарвозасидан тўп ўтказиб юборган. Умид қиламизки, Деян Журжевич бошчилигидаги футболчиларимиз ушбу ёқимли анъанани давом эттира олишади.

Беллашувни Олим ТОлибжонов бошқариб боради. Ёшлар таркиблари ўртасидаги ўйин эртага соат 18:00да бошланса, асосий жамоалар баҳси шанба куни соат 18:30да старт олади.

16 июнь, шанба
«Шўртан» (Ғузор) – «Пахтакор» (Тошкент)
Ҳакамлар: Олим Толибжонов (Тошкент), Алексей Миронов (Тошкент), Олег Дачев (Тошкент), Зокир Қодиров (Навоий).
Назоратчи: Азамат Абдуллаев (Тошкент).