Хабарингиз бор, юртимизда кеча ёзги трансфер “ойнаси” ёпилди.

Суперлига жамоалари ҳам ушбу трансфер “ойнаси”дан самарали тарзда фойдаланиб,таркибларини кучайтиришга ҳаракат қилишди.

Улар орасида албатта, жорий мавсумда ўз олдига юксак мақсадлар қўйган “Навбаҳор” ҳам бор.

"Таъкидлаш жоизки, жамоамиз ёзги трансфер бозорида анча фаоллик кўрсатди ва ўз таркибига тажрибали ҳамда маҳоратли футболчиларни қўшиб олди.

Бунда эса “Навбаҳор” ПФКга барча қулай шароитларни яратиб бераётган Наманган вилояти ҳокими, вилоят футбол ассоциацияси президенти Шавкат Шокиржанович Абдураззоқов, “Навбаҳор” ПФК раҳбарияти, жумладан, клуб президенти Отабек Арифович Саматовнинг муносиб ҳиссалари бор.

Давралар оралиғида жамоамиздаги ўзгаришларга тўхталадиган бўлсак, “лочинлар” сафини ярим ҳимоячилар – Ислом Кенжабоев (“Қизилқум”), Эҳсони Паншанбе (“Зоб Ахан”, Эрон), Элгужа Григалашвили (“Динамо”, Самарқанд), ҳужумчилар – Андрей Сидоров (“Қўқон-192”) ва Иброҳим Ғанихонов (“Сурхон”) тарк этишди.

“Навбаҳор” сафига эса ҳимоячи Владимир Козак, ярим ҳимоячилар – Диёржон Туропов ҳамда Дониёр Абдуманнопов, ҳужумчилар – Мирлан Мурзаев, Жасур Яхшибоев ва Александр Касьян қўшилишди.

Биз жамоамизни тарк этган ўйинчиларга “Навбаҳор”даги фаолиятлари учун ўз миннатдорчилигимизни билдирамиз ҳамда янги клубларида омад ёр бўлишини тилаймиз.

“Лочинлар” сафига қўшилган янги футболчилардан эса чиройли ўйинлар ва голлар кутиб қоламиз ҳамда “Навбаҳор”нинг зафарларига муносиб ҳиссаларини қўшишларига тилакдошмиз." - дейилади "Навбаҳор"нинг расмий баёнотида.