Xabaringiz bor, yurtimizda kecha yozgi transfer “oynasi” yopildi.

Superliga jamoalari ham ushbu transfer “oynasi”dan samarali tarzda foydalanib,tarkiblarini kuchaytirishga harakat qilishdi.

Ular orasida albatta, joriy mavsumda o‘z oldiga yuksak maqsadlar qo‘ygan “Navbahor” ham bor.

"Ta’kidlash joizki, jamoamiz yozgi transfer bozorida ancha faollik ko‘rsatdi va o‘z tarkibiga tajribali hamda mahoratli futbolchilarni qo‘shib oldi.

Bunda esa “Navbahor” PFKga barcha qulay sharoitlarni yaratib berayotgan Namangan viloyati hokimi, viloyat futbol assosiasiyasi prezidenti Shavkat Shokirjanovich Abdurazzoqov, “Navbahor” PFK rahbariyati, jumladan, klub prezidenti Otabek Arifovich Samatovning munosib hissalari bor.

Davralar oralig‘ida jamoamizdagi o‘zgarishlarga to‘xtaladigan bo‘lsak, “lochinlar” safini yarim himoyachilar – Islom Kenjaboyev (“Qizilqum”), Ehsoni Panshanbe (“Zob Axan”, Eron), Elguja Grigalashvili (“Dinamo”, Samarqand), hujumchilar – Andrey Sidorov (“Qo‘qon-192”) va Ibrohim G‘anixonov (“Surxon”) tark etishdi.

“Navbahor” safiga esa himoyachi Vladimir Kozak, yarim himoyachilar – Diyorjon Turopov hamda Doniyor Abdumannopov, hujumchilar – Mirlan Murzayev, Jasur Yaxshiboyev va Aleksandr Kasyan qo‘shilishdi.

Biz jamoamizni tark etgan o‘yinchilarga “Navbahor”dagi faoliyatlari uchun o‘z minnatdorchiligimizni bildiramiz hamda yangi klublarida omad yor bo‘lishini tilaymiz.

“Lochinlar” safiga qo‘shilgan yangi futbolchilardan esa chiroyli o‘yinlar va gollar kutib qolamiz hamda “Navbahor”ning zafarlariga munosib hissalarini qo‘shishlariga tilakdoshmiz." - deyiladi "Navbahor"ning rasmiy bayonotida.