"Бунёдкор" клуби вице-президенти Баҳром Давлатов ўз блогида Осиё чемпионлар Лигасининг чорак финалидаги рақиблари борасида фикрларини билдириб ўтди.

"Қуръа биз учун анчайин яхши таниш бўлган жамоани рўбарў қилди. Аделаидаликлар билан гуруҳ босқичи доирасида учрашганмиз. Тошкентдаги баҳсда рақибга ютқазиб қўйгандик. Бироқ шуни унутмаслик керакки, ўша пайтда “Бунёдкор” ҳали бирон маротаба ҳам расмий ўйин ўтказмаган ва асосий таркиб аниқлаб олинмаганди. Австралияда эса чемпионатнинг айни қизиган пайти эди. Шунингдек, “Аделаида Юнайтед” ички мусобақаларда муваффақиятсизликка учрагач, бор имкониятларини Чемпионлар лигасига қаратган эди".

"Кузда бўладиган эндиги баҳсга жамоалар тамомила бошқача кўринишда етиб келадилар. Биз роса кучга тўлган ва ўйинимизни янада шакллантирган ҳолатда бўлсак, рақиб янги мавсум стартида бўлади".

"Гуруҳ босқичининг илк учрашувини ўз майдонимизда ўтказган эдик. Энди эса “Аделаида” билан баҳсни рақиб майдонида бошлаймиз".

"Шу боисдан ҳам бизда реванш олиш ва ярим финалга йўлланма олиш учун ажойиб имконият бор. Клуб раҳбарияти жамоани қитъамизнинг клублар ўртасидаги энг нуфузли турнирнинг ҳал қилувчи босқичига муносиб тайёргарлик кўриш ва муваффақиятли иштирокни давом эттириш учун барча шароитларни яратиб беради", деб ёзади Давлатов ўз блогида.