Криштиану Роналду бугун профессионал фаолиятининг 20 йиллигини нишонламоқда. Унинг "Спортинг" таркибидаги дебюти 2002 йил 14 августда бўлиб ўтганди. Ўшанда 17 ёшли Роналду Чемпионлар лигаси саралашидан ўрин олган "Интер"га қарши ўйинда (0:0) 32 дақиқа ўйнаганди.
"Спортинг"да Криштиану Роналдунинг иқтидорини "Манчестер Юнайтед" вакиллари пайқашди. 2003 йилнинг ёзида инглиз клуби португалияликни сотиб олди. Айнан "Олд Траффорд"да Роналду ҳақиқий футбол юлдузига айланди. 2009 йилда Криштиану "Реал"га ўтди ва у ерда 9 мавсум ўтказди ҳамда кўплаб совринларни қўлга киритди. 2018 йилда Роналду "Ювентус" таркибига кўчиб ўтиб, 2021 йилда "Манчестер Юнайтед"га қайтди.
Миш-мишларга кўра, Криштиану Роналду ёзда яна клубини ўзгартириши мумкин.
