«Бунёдкор»нинг универсал ўйинчиси – ҳам ҳужумда, ҳам чап қанот ярим ҳимоясида, ҳам ҳужумчи ортида ҳаракат қила оладиган 24 ёшли Анвар Ражабов бугун, 19 июнь куни Таиланднинг амалдаги чемпиони билан 2 йилга мўлжалланган шартномага имзо чекди.

10-турнинг «Бунёдкор» – «Насаф» баҳсини захира ўриндиғида ўтказиб, эртаси куни футболчи ўз агенти Санъат Шарипов билан Тошкентдан Бангкок шаҳрига учиб кетишган эди. Кеча Ражабов Таиланд пойтахтидаги нуфузли госпиталлардан бирида чуқур тиббий кўрикдан ўтказилди. Ушбу тиббий назорат натижалари ижобий чиққач, бу йилги Осиё Чемпионлар лигаси гуруҳ босқичида ўзига хос сенсациялар қайд этган «Бурирам Юнайтед» раҳбарияти Анвар билан икки йиллик шартнома тузди.

Ражабов «Юнайтед» сафида 10-рақам остида тўп сурадиган бўлди. Унинг футболкасига эса янги клуби «ANVAR» ёзувини қўйишга қарор қилган.

— Мен Таиланднинг энг етакчи клуби таркибига келиб қўшилганимдан хурсандман, — дейди Ражабов. — Бу мен учун ўзимни янги муҳит, янги чемпионат ва ўзгача футболда синаб кўришга ажойиб имконият. «Бунёдкор»да ўйин амалиётисиз қолгандим: Ўзбекистон чемпионатида атиги бир ўйин (у ҳам бўлса 31 дақиқа) ўтказдим, Чемпионлар лигасида мураббийлар менга майдонда 2 учрашувда жами 31 дақиқа ҳаракат қилиш имконини беришди. Юртимизда ярим мавсум охирлаб қолган бир пайтда, мен майдонда бор-йўғи 62 дақиқа тўп сурибман. Натижада, терма жамоага умуман чақирилмай қўйдим. Шу жиҳатларни чуқур ўйлаб кўрдим. Менга муҳитни алмаштириш зарур эканлигига қарор қилиб, шундан сўнг «Бурирам» билан битим имзолашга ахд қилдим.

Футболчининг агенти Санъат Шарипов ҳам Анвар Таиландда кўп ўйин амалиётига эга бўлишига ҳамда юқори савиядаги футбол кўрсатишига ишонмоқда:

— «Бурирам» раҳбарияти Ражабовнинг ўтган йилги бир нечта ўйинларини кўриб чиқиб, уни бирдан ёқтириб қолди. Унинг қўрқмасдан 2-3 нафар рақибни алдаб ўтишга киришишини, кучли зарбаларини, бир сўз билан айтганда, катта салоҳиятга эга эканлигини таиландлик мутахассислар алоҳида таъкидлашди. Ва футболчига дарҳол 2 йилллик шартнома таклиф этишди. Менимча, ўйин амалиётига умуман эга бўлмаётган Анвар учун бу яхши ўзгариш. Анварнинг майдондаги ботирлиги Таиланд футболига роса мос тушади. Ўйлайманки, «Бурирам»даги фаолияти футболчимиз учун яна юқори савияга қайтиш учун ўзига хос кўприк вазифасини ўтайди.

«Бурирам Юнайтед» клубининг бош менежери Тадтеп Питакпулсин ҳам мазкур трансфер юзасидан ўз фикрларини баён қилди:

— Биз ўзбек футболчилари кучини юқори баҳолаймиз. Анвар жамоамиз етакчиларидан бирига айланишини истайман. Бизнинг янги аъзоимиздан умидларимиз жудаям улкан. Яқин ярим йил футболчининг бизга мослашиши учун кетади. 2013 йилги Чемпионлар лигасида эса биз энди Анвардан кўп нарсалар кутамиз. Шунинг учун ҳам уни сафимизга бирдан икки йилга қўшиб олдик.

Суратда: Тадтеп Питакпулсин, Анвар Ражабов, Санъат Шарипов.