Биласиз, бугун аёллар клублари ўртасидаги Осиё чемпионати Ғарб минтақаси ўйинлари старт олади. Унда юртимиз шарафини ҳимоя қиладиган “Сўғдиёна-W” Эроннинг “Бам Хатун”га қарши илк учрашувини ўтказади. Бугун Қаршидаги “Марказий” стадион анжуманлар залида ҳар икки жамоа бош мураббийлари ва етакчи футболчилари иштирокида матбуот анжумани ташкил этилди.

8 карра Эрон чемпиони “Бам Хатун” клуби бош мураббийи Марзиеҳ Жафарибаравати қуйидагича фикр билдирди:

- Ушбу мусобақага жуда яхши ҳозирлик олиб бордик. Бу каби турнирлар аёллар футболи ривожига жиддий туртки беради. Аёллар жамоалари ўртасидаги Осиё чемпионатида иштирок этаётганимиздан чиндан бахтиёрман, - деди Жафарибаравати.

Шунингдек, “Бам Хатун” жамоаси аъзоси Атефе Рамизанизаде қуйидагича фикрлар билдирди:

- Биз мусобақа олдидан яхши йиғин ташкил қилдик. “БИИК Чимкент” ва “Тўмарис Турон” каби қозоқ жамоалари билан баҳс юритдик. Энди олдиндаги иккита ўйинда ижобий натижа қайд этмоқчимиз, - деди Рамизанизаде.

Таъкидлаб ўтамиз, “Бам Хатун” – “Сўғдиёна-W” учрашуви бугун Қаршидаги “Марказий” стадионда бўлиб ўтади ва соат 17:00да старт олади.