Журналист Фабрицио Романонинг фикрича, ҳужумчи Эдинсон Кавани фаолиятини Испанияда давом эттириши мумкин.
Манбага кўра, 35 ёшли уругвайлик футболчига "Валенсия" даъвогарлик қилмоқда. 29 август куни клуб вакиллари футболчи билан шартномани яна бир бор муҳокама қилиш ниятида. Испания жамоаси форвард билан икки йиллик шартнома тузишга тайёр.
Кавани "Манчестер Юнайтед" билан шартномаси якунланганидан кейин 1 июлдан бери эркин агент мақомига эга. Ўтган мавсумда ҳужумчи барча мусобақаларда 20та ўйинда майдонга тушиб, 2та гол урган.