Қозоғистон Премьер-лигасида тўп сураётган Ўзбекистон миллий терма жамоаси квартети 14-тур қаҳрамонларига айланишди.

«Актобе» клуби шарафини ҳимоя қилаётган трио – Марат Бикмаев, Тимур Кападзе ва Александр Гейнрих жамоадаги дастлабки икки ўйиндаёқ ўзларини кўрсатишга муваффақ бўлишганди. Аввалига 13-турда Тимур Кападзе муҳим голга муаллифлик қилиб, жамоасининг 2:1 ҳисобидаги ғалабасини таъминлаган бўлса, «Лочин» клубига қарши бўлиб ўтган мамлакат Кубоги нимчорак финалида «Актобе» 5:0 ҳисобида муваффақият қозонганди. Ҳисобни Тимур Кападзе очиб берган бўлса, меҳмонлар дарвозасига киритилган иккинчи гол Марат Бикмаев ҳисобига ёзилганди.

Кеча бўлиб ўтган ҳисоб бўйича учинчи ўйинда Александр Гейнрих Премьер-лигадаги дебют голини нишонлади. Муборакнинг «Машъал», Қаршининг «Насаф» клубларида фаолият олиб борган Виктор Кумиков бошқарувидаги амалдаги чемпион – Қарағанданинг «Шахтёр» клубини қабул қилган «Актобе» Гейнрихнинг 6-дақиқада киритган ягона голи эвазига зафар қучди – 1:0. Қайд этиш керак, 14-турдан кейин «Шахтёр» 25 очко билан иккинчи ўринда бораётган бўлса, «Актобе» кечаги ғалабасидан сўнг очколари сонини 23тага етказиб, 5-ўринга кўтарилиб олди.

Кеча – 24 июнь куни шунингдек Улуғбек Бақоев учун ҳам омадли келди. У ҳаракат қилаётган «Иртиш» клуби Премьер-лигани бошқариб турган «Тобол» майдонидан 1 очко билан қайтди. 2:2 ҳисобида якунига етган ўйинда Бақоев жамоасининг иккинчи голига муаллифлик қилди. Айни пайтда 23 очкога эга бўлган «Иртиш» 6-поғонадан жой олган.

Шу билан легионер футболчилар 27 июнь куни Қозоғистон Кубогининг нимчорак финал жавоб ўйинида майдонга тушишади. Мамлакат биринчилигидаги 15-тур беллашувлари 1 июль – якшанба кунига тайин қилинган. Унда «Иртиш» сўнгги – 14-ўринда бораётган «Окжетпес»ни қабул қилса, «Актобе» 13-ўриндаги «Жетису» меҳмони бўлади. Назарий жиҳатдан мазкур ўйинлардаги ғалаба ҳар икки клубни 2-ўринга олиб чиқиши мумкин.