УЕФА Европа чемпионати ярим финалларни бошқариб борувчи ҳакамлар рўйхатини эълон қилди.
Унга кўра, 27 июнь куни Донецкдаги "Донбасс-арена"да бўлиб ўтадиган Португалия - Испания баҳсини Жунайд Чақир бошлиқ туркиялик ҳакамлар бригадаси бошқариб боради. Унга қанотларда Баҳаттин Дуран ва Тарик Онгун, дарвоза ортида Ҳусайн Гўчек ва Булент Йилдиримлар ёрдамлашади. Тўртинчи ҳакам - словениялик Давид Скомина.
Франциялик Стефан Ланнуага эса 28 июнь куни Варшавадаги "Миллий стадион"даги Германия - Италия баҳси ишониб топширилган. Унинг қанотдаги ёрдамчилари Федерик Кано ва Майкл Аннонлардир. Дарвоза ортидаги ҳакамлар: Фреди Фотрел ва Рудди Букет. Тўртинчи ҳакам: Ховард Уэбб.
