“Андижон” эртага Ўзбекистон Сoca-Cola Кубоги чорак финалида АГМК клубини қабул қилади. Бу ярим финал остонасидаги ўйин. Барча эътибор ушбу учрашувга қаратилган. Беллашув ҳар томонлама жиддий курашлар остида ўтиши шубҳасиз.
 
“Андижон” ўйиннинг аҳамиятини жуда яхши ҳис қилиб турибди ва максимал даражада тайёргарлигини давом эттирмоқда. Бундай пайтда жамоа аъзоларини руҳан, маънан ва албатта моддий томондан қўллаб-қувватлаш ҳам муҳим ҳисобланади.

Шу мақсадда “Андижон” футбол клуби президенти Журъатбек Қувватов машғулотдан кейин жамоа аъзолари билан учрашди. Аввало, барчани яна бир бор Ўзбекистон Республикасининг Мустақиллик байрами билан табриклади. Олдинда жуда муҳим ўйин кутаётганини, жамоа ҳали ярим финалгача етиб келмагани, аммо энди бу нохуш анъанага барҳам бериш фурсати келганини айтиб, тарихни бирга яратиш учун ажойиб имконият борлигини алоҳида таъкидлади. Жамоа аъзоларини моддий томондан рағбатлантириш ҳам амалга оширилгани эътиборга молик. Бир сўз билан айтганда, барча ҳаракат ва эътибор чорак финал учрашувига қаратилган.

“Андижон” матбуот хизмати.