"Бавария" ҳимоячиси Бенжамен Павард ёзда мюнхенликлар жамоасини тарк этиши мумкинлигини тан олди. Эслатиб ўтамиз, франциялик футболчининг “Альянц Арена”даги келажаги Туриннинг “Ювентус” клубидан ўтган Маттиас де Лигтнинг трансферидан кейин сўроқ остида қолган эди.
“Ёзда мен ўзимга жуда кўп саволлар бердим. Менга кўплаб клублардан қўнғироқ қилишди. Балки бир кун келиб шу жамоалардан бирида бўларман, лекин Нагельсманн билан суҳбатлашдим. У менга унинг режаларининг бир қисми эканлигимни аниқ тушунтирди” - деди Павард Telefoot нашрига берган интервьюсида.
Павард қизиққан клублардан бири ҳимоя марказини кучайтирмоқчи бўлган "Манчестер Юнайтед" эди. Якунда Бенжамин Мюнхенда қолди ва мавсумни Бундеслиганинг 5 ўйинида битта гол билан бошлади.