Футзал бўйича клублар ўртасидаги Осиё чемпионати биринчи турида Тошкентнинг «Ардус»га 3:4 ҳисобида имкониятни бой берганига қарамай, Япониянинг «Нагоя Оушенс» клуби бош мураббийи Жозе Амаранте мусобақанинг навбатдаги ўйинларида жамоаси муваффақиятли ўйин курсатишига умид қилмоқда.

«Бугун биз яхши ўйин кўрсатдик ва жамоам намойиш этган ўйин сифати мени қониқтирди. Шунга қарамай, ўйин натижаси бизнинг фойдамизга ҳал бўлмади, биз имкониятни бой бердик. Мағлубиятимизга кўп жиҳатдан ўзимиз сабабчимиз, деб ўйлайман. Энди биз руҳан ўзимизни қўлга олиб, «Ардус» билан ўйинни эсдан чиқариб, қолган ўйинларга тайёргарлик кўришимиз керак. Ҳали ҳеч нима йўқотилгани йўқ», - деди Амаранте.

«Ардус» таркибида кимни алоҳида ажратиб кўрсатган бўлардингиз?», қабилидаги саволга Амаранте қуйидагича жавоб берди: «Бугунги рақибимиз ажойиб жамоавий ўйин кўрсатди, шунинг учун ҳам унинг таркибидан кимнидир алоҳида ажратиб кўрсатмоқчи эмасман. Менга айниқса «Арудс» ўйинчиларининг жисмоний ҳолати маъқул келди. Кўп жиҳатдан айнан мана шу омил бугун «Нагоя» устидан ғалаба қозонишда ёрдам берди».