"Манчестер Сити" германиялик ярим ҳимоячи Илкай Гюндоганни ўз таркибида сақлаб қолиш ниятида, аммо якуний қарорни футболчининг ўзи қабул қилади, дея хабар беради журналист Фабрицио Романо.
Манбага кўра, "Барселона" томонидан қизиқиш бўлишига қарамай, футболчининг трансфери бўйича аниқ музокаралар олиб борилмаяпти. Эслатиб ўтамиз, 31 ёшли ярим ҳимоячининг “шаҳарликлар” билан амалдаги шартномаси келаси ёзгача мўлжалланган, шу боис жорий мавсум якунида у инглиз клубини текинга тарк этиши мумкин.
Гюндоган 2016 йилнинг ёзида Дортмунднинг "Боруссия" жамоасидан 27 миллион евро эвазига "Манчестер Сити"га ўтган эди. Ярим ҳимоячи жорий мавсум “шаҳарликлар” сафида 12 та ўйинда майдонга тушиб, 2 та гол урди ва битта голли узатмани амалга оширди. Transfermarkt портали Германия терма жамоаси футболчисини 25 миллион еврога баҳоламоқда.
