"Manchester Siti" germaniyalik yarim himoyachi Ilkay Gyundoganni o‘z tarkibida saqlab qolish niyatida, ammo yakuniy qarorni futbolchining o‘zi qabul qiladi, deya xabar beradi jurnalist Fabrisio Romano.

Manbaga ko‘ra, "Barselona" tomonidan qiziqish bo‘lishiga qaramay, futbolchining transferi bo‘yicha aniq muzokaralar olib borilmayapti. Eslatib o‘tamiz, 31 yoshli yarim himoyachining “shaharliklar” bilan amaldagi shartnomasi kelasi yozgacha mo‘ljallangan, shu bois joriy mavsum yakunida u ingliz klubini tekinga tark etishi mumkin.

Gyundogan 2016 yilning yozida Dortmundning "Borussiya" jamoasidan 27 million yevro evaziga "Manchester Siti"ga o‘tgan edi. Yarim himoyachi joriy mavsum “shaharliklar” safida 12 ta o‘yinda maydonga tushib, 2 ta gol urdi va bitta golli uzatmani amalga oshirdi. Transfermarkt portali Germaniya terma jamoasi futbolchisini 25 million yevroga baholamoqda.