"Реал"нинг бельгиялик дарвозабони Тибо Куртуа "Барселона" билан Испания чемпионатининг навбатдаги ўйинида жароҳатидан фориғ бўлишга улгурмаяпти. Шундай қилиб, "Эл-класико"да мадридликлар дарвозасини украиналик Андрей Лунин ҳимоя қилади, деб хабар беради Marca.
Манба берган хабарга кўра, "Реал Мадрид" тиббиёт штаби Куртуанинг тикланишига эҳтиёткорлик билан ёндашишга ва уни умумий гуруҳга қайтаришга мажбурламасликка қарор қилган. "Барселона" билан ўйинда Лунин, Чемпионлар лигасининг сўнгги ўйинида бўлгани каби, Тибо ўрнига "Қироллик клуби" дарвозасида туради.
Эслатиб ўтамиз, 16 октябрь куни "Сантьяго Бернабеу" стадионида Мадриднинг "Реал" жамоаси Ла Лига 9-тур ўйинида "Барселона"ни қабул қилади. Саккизта ўйиндан сўнг жамоалар тенг очко тўплашди – 22, аммо тўплар нисбати бўйича “Барселона” турнир жадвалида юқорироқда.
