"Манчестер Юнайтед"нинг собиқ ҳужумчиси Дуайт Йорк Криштиану Роналду билан суҳбати ҳақида гапирди.

"Мен у билан олти ой олдин гаплашганман, машғулотдан сўнг у билан ярим соат вақт ўтказдим. Мен клубда қолиш истаги ва иштиёқи бор йигитни кўрдим. Аммо ёзда вазият ёмонлашди.

Менимча, клуб хатога йўл қўйди ва тен Хаг мавсум олдидан Роналдунинг бошида нималар бўлаётганини билиш учун имкониятни бой берди. Мен Криштианудан шунчалик кўп нарсани ўргандимки, агар мен бу ҳақда гаплашмоқчи бўлсам, "Манчестер Юнайтед" жим туришим учун менга 5 миллион фунт тўлаши керак эди.

У қолишни, ғалаба қозонишни, йўқотилган ҳурматини ўз клубига қайтаришни жуда хоҳларди. Менимча, "Манчестер Юнайтед" унга сардорлик боғичини бериши керак эди.

Унинг шартномаси тугашига бир йил қолган эди, у жамоани тарк этишидан олдин сардор этиб тайинланиши ва жамоани бошқаришини сўраши керак эди. Ўйлайманки, бугунги драманинг ҳаммасини четлаб ўтиш мумкин эди ва Роналду ҳамда Магуайр рози бўлишарди. Бундан ташқари, бирга ўйнаш учун сиз энг яхши дўст бўлишингиз шарт эмас" - деди Йорк.