Европа лигасининг иккинчи босқичи доирасида ўтказилган "Милсами" (Молдова) ва "Актобе" (Қозоғистон) жамоалари ўртасидаги дастлабки баҳс ҳозиргина якунига етди. Унда молдоваликлар 4:2 ҳисобида ғалаба қозонишди.

Актобеликлар сафидаги ҳар учала ҳамюртимиз — Гейнрих, Кападзе, Бикмаев асосий таркибда майдонга тушишди. Темур ўйиннинг 8-дақиқасида ўйиндаги ҳисобни очиш билан бирга, ўзининг УЕФА тасарруфи остидаги мусобақадаги илк голини киритди. Бурчакдан узатиб берилган тўпни Кападзе бош билан дарвоза тўрига жойлади.

Биринчи бўлимда майдон эгалари Богью ва Велингтоннинг голи эвазига ҳисобда олдинга чиқиб олган бўлсалар, 51-дақиқада яна ўша Богью ҳисобни 3:1га етказди. Орадан кўп ўтмай Самат Смаков ҳисобни жавоб баҳси олдидан қозоғистонликлар учун қулайроқ (3:2) кўринишга келтирган бўлса, ўйин тугашига 3 дақиқа қолганида Гети мезбонларни 2та тўп фарқи билан ғалабасини таъминлади.

Ўйинда барча ҳамюртларимиз тўлиқ ҳаракат қилишди. Улар анча фаол ўйнашди. 82-дақиқада Гейнрихнинг бош билан берган зарбаси дарвоза тўсинига тегиб қайтди.

Жавоб ўйини 26 июль куни Актобе шаҳрида бўлиб ўтади.

ЕВРОПА ЛИГАСИ. ИККИНЧИ БОСҚИЧ
"МИЛСАМИ" (Молдова) - "АКТОБЕ" (Қозоғистон) - 4:2
Голлар: Богью (16, 51), Велингтон (33), Гети (87) - Темур Кападзе (8), Самат Смаков (56)