"Барселона" молиявий муаммоларга қарамай, трансфер бозорида яхши иш қилди. Энди каталонияликларнинг таркиби тўлиқ кўринади, аммо кадрлар билан боғлиқ муаммолар сақланиб қолмоқда. Мисол учун, тўрт нафар фахрий билан нима қилиш керак. Уларнинг барчаси клуб тарбияланувчиларидир, аммо уларнинг ҳар бирининг ўз клубидаги вақтлари ниҳоясига етмоқда.
Жерар Пике
Пике кўп йиллар давомида "Барселона"нинг рамзи бўлиб келган. Эҳтимол, у ҳозир ҳам шундай бўлиб қолмоқда, гарчи сўнгги пайтларда футболчи клубда энг яхши ҳолатда эмаслиги ҳақида кўпроқ маълумотлар пайдо бўлди. Айтилишича, бош мураббий Хави Эрнандес футболчидан норози ва унинг январда жамоани тарк этишини истамоқда. Шу билан бирга, 35 ёшли марказий ҳимоячининг каталонияликлар билан шартномаси 2024 йилнинг июнигача мўлжалланган. "Атлетик" ҳимоячиси Иниго Мартинес жорий мавсум охирида эркин агентга айланиши мумкин бўлган Жерарга ўринбосар сифатида кўрилмоқда.
Пикенинг "Барселона"га содиқлигига шубҳа йўқ. Аммо ҳар бир ҳикоя эртами-кечми тугайди. Хави марказий ҳимоячи сифатида Жюл Кунде, Андреас Кристенсен, Рональд Араухо ва Эрик Гарсияга эга. Жерар - мутахассис учун тўртинчи ёки бешинчи вариант. Бу Каталония клубида 613 ўйин ўтказган одамга мос келадими? Ёзда (қишда бўлиши даргумон) томонлар келишувни бекор қилишлари мумкин. Бундан кейин Пике ҳатто фаолиятини якунлаши кутиляпти, чунки у бошқа клубларда ўйнашга қизиқмайди.
Жорди Альба
Альба ҳам Пике каби клубда қийин аҳволда. Бир неча ой олдин футболчи кўп нарсани айтиб бера олишини, аммо ўз клубига қарши бундай қилмаслигини айтганди. Балки испаниялик раҳбарият билан зиддиятга тушиб қолгандир. Ўйин нуқтаи назаридан у ҳам ҳар доим ҳам яхши ўйнайди, деб бўлмайди. Альба майдонда кам вақт ўтказмоқда. Фахрийни 19 ёшли Алекс Бальде таркибдан чиқариб юбора бошлади. Каталонияликлар узоқ вақтдан бери 33 ёшли ҳимоячига ўринбосар излашди ва якунда уни ўз академиясида топишди.
Альбанинг "Барселона" билан шартномаси 2024 йилнинг июнигача мўлжалланган, бироқ томонлар тезроқ хайрлашиши мумкин. Жорди шартнома муддати тугагунча каталонияликларни тарк этиши мумкин, аммо у ишсиз қолмайди. ОАВ хабарига кўра, ҳимоячининг эҳтимолий трансферига бир қанча клублар, жумладан, "Ювентус" ҳам қизиқиш билдирмоқда.
Серхи Роберто
Роберто бир неча йиллардан бери "Барселона"ни тарк этиш арафасида эди, бироқ айни пайтда клубда қолмоқда. Ўтган ёзда томонлар ҳатто 1 йилга янги шартнома имзолашди. Бу қарорнинг ташаббускори Хави эди. Мутахассис футболчини бир нечта позицияларда ўйнай олиши учун қадрлайди. Жорий мавсумда у Испания чемпионатида атиги 3та ўйинда асосий таркибда майдонга тушди.
Робертонинг ҳам келажаги ноаниқ. Биринчидан, футболчининг яқинда узайтирилган шартномаси тугайди. Иккинчидан, испаниялик анча муваффақиятли чиқишлари фонида жиддий жароҳат олди. 30 ёшли ҳимоячи ушбу мавсумда барча турнирларда 12 та ўйинда майдонга тушиб, 2 та гол ва 2 та голли узатмани амалга оширди.
Серхио Бускетс
Бускетс - "Барселона"нинг тирик афсонаси ва жамоа сардори. У жамоа учун 693 та ўйин ўтказган. Бу бир клуб учун майдонга тушиш бўйича Европадаги энг юқори кўрсаткичлардан биридир. 34 ёшли ярим ҳимоячининг каталонияликлар билан шартномаси жорий мавсум охиригача ҳисобланган. Унинг ўйин вақти билан боғлиқ муаммолари йўқ, аммо "Барселона" ҳалигача ветераннинг ёшини инобатга олган ҳолда унинг ўрнига футболчи қидирмоқда. Испаниялик футболчининг ўрнига Рубен Невеш ва Мартин Субименди номлари кўрсатилган.
Миш-мишларга кўра, Бускетснинг ўзи каталонияликлар билан янги келишувдан бош тортган ва фаолиятини бошқа жойда давом эттиришга қарор қилган. Испаниялик футболчи МЛС билан боғланади, у ерда асосий даъвогар "Интер Маями" ҳисобланади. Футболчи бу маълумотни инкор этиб, келажаги ҳақида мавсум якунида бир қарорга келишини билдирмоқда. Қандай бўлмасин, Бускетс фаолиятини қаерда давом эттириш ёки тугатишни мустақил ҳал қилиш ҳуқуқини қўлга киритди. Мавсум охирига қадар у “кўк-анорранглилар” сафида 700 дан ортиқ ўйин ўтказган бўлади. Бундай кўрсаткичга эга футболчининг ҳар қандай қарорини клуб қабул қилиши керак.
