Суперлига 24-туридан ўрин олган “Нефтчи” – АГМК (1:3) ўйинидан сўнг меҳмонлар бош мураббийи Миржалол Қосимов жамоасининг иккинчи бўлимдаги ўйини таҳсинга сазовор эканлигини ва ёмғирга қарамасдан жамоалар чиройли ўйин кўрсатганини айтди.
“Икки хил бўлим гувоҳига айландик. Биринчи таймда ўйинимиз қовушмади. Хато эвазига гол қўйиб юбордик. Иккинчи таймда эса вазиятни ўнглай олдик. Иккинчи тайм учун футболчиларимга алоҳида раҳмат”, - дейди Қосимов.
“Мақсад уч очко эди ва унга эришдик. Қолаверса, Ботирали Эргашев учун ҳам йигитлар далда бўлишди. Хатодан сўнг, футболчида психологик жиҳатдан пасайиш кузатилиши мумкин. Шу боис йигитлар жонларини бериб ҳаракат қилишди ва керакли натижани қўлга киритишди”.
“Қўл остимда қанча футболчи бўлса, уларнинг барчасига имкон беришга ҳаракат қиламан. Шу боис, майдонга тушган ҳар бир футболчи жамоа учун жон куйдириши керак”.
