Ўзбекистон миллий терма жамоасига аъзо икки нафар футболчи тўп сураётган Украина Премьер-лигасида 2-тур беллашувларига якун ясалди.

Биринчи турдаги голи билан «Днепр»нинг ғалабасига муҳим ҳисса қўшган Виталий Денисов, 2-турни ҳам тўлиқ ўтказди. У тўп сураётган «Днепр» клуби Запарожьеда «Металлург» меҳмони бўлиб, йирик – 4:0 ҳисобида муваффақият қозонди. 2-турдан кейин днепропетровскликлар 6 очко билан турнир жадвалининг 2-пағонасидан жой олишган. Виталий Денисов жамоадошларидан ташқари «Шахтёр», «Заря», «Металлист», «Кривбас» ва Киевнинг «Динамо» клублари ҳам 2-турдан кейин юз фоизлик натижа қайд этиб туришибди.

Яна бир ўзбекистонлик Максим Шацких ҳаракат қиладиган Киевнинг «Арсенал» клуби пойтахт дербисида «Динамо»дан енгилди – 0:1. Учрашувдаги ягона гол беллашувнинг 3-дақиқасидаёқ киритилганди. «Динамочилар» шунингдек 69-дақиқада пенальтидан аниқ фойдалана олишмади. «Шахтёр»га қарши дастлабки турни (0:6) тўлиқ ўтказган Максим Шацких, кечаги ўйиннинг 71-дақиқасида Мазилунинг ўрнига майдонга тушди. Орадан 7 дақиқа ўтиб эса «тўпчилар» майдонда бир киши кам қолишди. 2-турдан кейин «Арсенал» турнир жадвалининг сўнгги пағонасидан жой олган.

Украина Премьер-лигасида 3-тур ўйинлари 28 июль куни бўлиб ўтади. Унда «Днепр» Донецкнинг «Металлург» клубини қабул қилади. Донецкликлар ҳар иккала ўйинни бой берган жамоалар ичида энг яхши кўрсаткич қайд этишмоқда. Дастлабки икки турни чемпионлик учун асосий даъвогар бўлган «Шахтёр» ва «Динамо»га қарши ўтказган Киевнинг «Арсенал» жамоаси 3-турда «Заря» меҳмони бўлади. Лугансклик футболчилар дастлабки икки турни ўз фойдаларига ҳал қилишгани юқорида кўрсатиб ўтилган.