"Манчестер Юнайтед" тарихидаги энг яхши тўпурар ҳисобланган Уэйн Руни Англиянинг Жаҳон чемпионати учун мўлжалланган таркибини ўз қарашларига кўра шакллантирди. 37 ёшли собиқ футболчи айни дамда МЛСнинг "DC United" клубига бошчилик қилмоқда. Аммо АҚШда ҳозир мавсум якунланиб қолди. Шу сабабли Руни дам олиш учун ўз юрти, Англияга қайтган. Собиқ ҳужумчи мундиални томоша қилиш ва ўз жамоасини қўллаш учун Қатарга бориши кутилмоқда.

Руни "talkSPORT" нашри билан суҳбатда Англиянинг ҳозирги футболчиларидан тузилган терма жамоани маълум қилди. Унинг версиясидаги жамоа қуйидагича бўлади. "МЮ" афсонаси 4-2-3-1 тактик схемасини қўллашни маъқул кўрди. Дарвозани "Эвертон" посбони Жордан Пикфорд эгаллайди. Ҳимоя учун "МЮ"нинг икки вакили бўлган Магуайр ва Люк Шоу танланди. Улар Жон Стоунс ва Александер-Арнольдга қўшилиб, мудофаани ташкил этиб беришади. Аммо Рунининг охирги қарори, яъни Трентни, Триппьер ва Уокердан кўра афзал кўргани, ҳаммани ҳайрон қолдирган бўлса, ажаб эмас.

Ярим ҳимоя ҳам бироз ўзгача кўриниш олган. Хусусан, таянч нуқтасига Деклан Райс ва Калвин Филлипс танланган. Филлипс қарори ғалатироқдир. Негаки, "шаҳарликлар" вакили сентябрь ойининг ўртасидан бери майдонга тушмаган. Аммо Рунининг Жюд Беллингемни танлаши, жуда ҳам тўғри амалга оширилди. Беллингем собиқ ҳужумчининг жамоасида ўнинчи рақам вазифасини бажариб беради. Ҳужум чизиғи эса қуйидагича кўриниш олди: ўнг қанотда "Арсенал" тарбияланувчиси Букайо Сака ҳаракат қилади. Чап эса Фил Фоденга ишониб топширилади. Марказий ҳужум учун Харри Кейндан фойдаланилади. Айтгандек, Кейн Англия терма жамоасида гол уриш борасида Рунининг рекордини янгилашга яқин турибди. "Тоттенхэм" ҳужумчиси ҳисобида айни дамда 51 та гол мавжуд. Рекорд эса 53 тага тенг.

Эслатиб ўтамиз, Англия терма жамоаси Жаҳон чемпионатини 21 ноябрь куни, Эронга қарши ўйин билан бошлайди. Гуруҳнинг қолган баҳслари 25 (АҚШ) ва 29 ноябрь (Уэлс) саналарида бўлиб ўтади.

ИСМАТОВ Ж.