"ПСЖ" ва Аргентина терма жамоаси ҳужумчиси Лионель Месси фаолиятини "Манчестер Сити"да давом эттириши мумкин, деб хабар бермоқда SPORT.
Манбага кўра, "шаҳарликлар" раҳбарияти 35 ёшли футболчини келаси ёзда ўз сафига қўшиб олишни режалаштирган. Қайд этилишича, "Манчестер Сити" Мессига расмий сўров юбориб, футболчига мавсумига 30 миллион евро маош билан икки йиллик шартнома таклиф қилган.
Эътиборли томони шундаки, етти карра "Олтин тўп" соҳибининг "ПСЖ" билан амалдаги шартномаси келаси йил ёзида тугайди, шу боис у "ПСЖ" клубини текинга тарк этиши мумкин бўлади.
Эслатиб ўтамиз, "шаҳарликларни"ни Каталония "Барселона" клубидаги фаолияти орқали аргентиналик билан яхши таниш бўлган испаниялик мураббий Хосеп Гвардиола бошқармоқда.
Месси жорий мавсумда "ПСЖ" сафида 19 та ўйинда майдонга тушиб, 12 та гол урди ва 14 та голли узатмани амалга оширди.
