Бугун индивидуал машғулот ўтказган Аргентина терма жамоаси сардори Лионель Месси болдир мушакларига катта юк тушгани учун умумий гуруҳда ишламади, деб хабар бермоқда Marca нашри.

35 ёшли ҳужумчи майдонга ҳаммадан кеч кирди, бироқ терма жамоанинг умумий машғулотларига қўшилмади ва индивидуал тарзда ишлади. Кеча, 18 ноябрь куни ҳам Месси якка тартибда машғулот ўтказди. Қайд этилишича, аргентиналик футболчи турнирдаги илк ўйинга тайёр бўлади.

Жаҳон чемпионати 20 ноябрдан 18 декабрга қадар Қатарда бўлиб ўтади. Аргентина "C" гуруҳида Саудия Арабистони, Мексика ва Польша билан ўйнайди. Месси учун яқинлашиб келаётган жаҳон чемпионати унинг фаолиятидаги бешинчи мундиал бўлади. 2014 йилда у ЖЧ финалига қадар етиб борган ва Аргентина Германияга мағлуб бўлган (0:1, қўшимча вақт). Умуман олганда, Месси жаҳон чемпионатининг 19 та учрашувида майдонга тушиб, 6 та гол урди ва 5 та голли узатмани амалга оширди.