Bugun individual mashg‘ulot o‘tkazgan Argentina terma jamoasi sardori Lionel Messi boldir mushaklariga katta yuk tushgani uchun umumiy guruhda ishlamadi, deb xabar bermoqda Marca nashri.
35 yoshli hujumchi maydonga hammadan kech kirdi, biroq terma jamoaning umumiy mashg‘ulotlariga qo‘shilmadi va individual tarzda ishladi. Kecha, 18 noyabr kuni ham Messi yakka tartibda mashg‘ulot o‘tkazdi. Qayd etilishicha, argentinalik futbolchi turnirdagi ilk o‘yinga tayyor bo‘ladi.
Jahon chempionati 20 noyabrdan 18 dekabrga qadar Qatarda bo‘lib o‘tadi. Argentina "C" guruhida Saudiya Arabistoni, Meksika va Polsha bilan o‘ynaydi. Messi uchun yaqinlashib kelayotgan jahon chempionati uning faoliyatidagi beshinchi mundial bo‘ladi. 2014 yilda u JCH finaliga qadar yetib borgan va Argentina Germaniyaga mag‘lub bo‘lgan (0:1, qo‘shimcha vaqt). Umuman olganda, Messi jahon chempionatining 19 ta uchrashuvida maydonga tushib, 6 ta gol urdi va 5 ta golli uzatmani amalga oshirdi.
