29 июль, якшанба куни Ўзбекистон Кубогида чорак финалнинг жавоб учрашувлари ўтказилади.

Голландиядан келтирилган чим ўтқазилган майдонда биринчи расмий учрашув бўлиб ўтади. Унда "Пахтакор" "Андижон"ни қабул қилади. 2012 йилда шу ҳолат туфайли жамоамиз уй беллашувларини "Жар" стадионида ўтказиб келаётганди. Энди эса мухлислар яна қадрдон стадионлари, "Пахтакор"га ташриф буюришлари мумкин. Давом этаётган муборак Рамазон ойида ишқибозларга қулайлик яратиш учун якшанба кунги учрашувнинг бошланиш вақти 20:00 қилиб белгиланди. Салқин ҳавода футболчиларнинг яхшироқ ҳаракат қилишлари, мухлисларнинг учрашувни қийналмасдан кузатишлари учун шундай қарорга келинди.

Андижонда ўтган биринчи баҳсда жамоамиз 2:1 ҳисобида зафар қучган. Ўшанда Эркинов ва Суюнов "Пахтакор"нинг голларига муаллифлик қилишганди.
«Андижон» – «Пахтакор» – 1:2. 4821 томошабин.
Ҳакамлар: О. Толибжонов (Тошкент), Р. Шояхметов (Тошкент), Д. Саидов (Тошкент), А. Раҳимов (Андижон).
Назоратчи: Р. Айтеков (Тошкент).
Голлар: Раҳмонов (26) – Эркинов (30), Суюнов (60).
Огоҳлантиришлар: Раҳмонов (26), Ҳайитов (57) – Суюнов (24), Қиличев (47).

Бу жуфтликда ғалаба қозонган жамоа "Бунёдкор" ва "Машъал" ўртасидаги жуфтлик ғолибига қарши ярим финалда майдонга тушади. Якшанба кунги учрашувни тошкентлик Шерзод Қосимов бошчилигидаги ҳакамлар гуруҳи бошқариб боради. Барча ишқибозларни "Пахтакор" Марказий стадионига таклиф этиб қоламиз. Севимли жамоангизни қўллаб-қувватланг.

Ўзбекистон кубоги. Чорак финал. Жавоб ўйини
«Пахтакор» – «Андижон»
Ҳакамлар: Шерзод Қосимов, Темур Абдуллаев, Жаҳонгир Саидов, Дмитрий Пислегин.
Назоратчи: Радик Серазитдинов.