Англиянинг "МЮ" ва "Ливерпуль" клублари сўнгги ҳафталар давомида ўзларининг америкалик эгалари томонидан сотувга қўйилди. Эндиликда, ушбу жамоаларга янги харидор чиқиши керак. Яқин йиллар давомида "МЮ"га қараганда, "Ливерпул"нинг муваффақиятлари кўпроқ эди. Юрген Клопп жамоани кўп нарсага эриштирди. Шунга қарамай, собиқ "МЮ" футболчиси Гари Невилл "Ливерпул"ни маҳсулот сифатида иккинчи ўринга қўяди. Унинг фикрига кўра, эҳтимолий харидорлар, аввало, "МЮ"га эътибор қаратишади. Қуйида Невиллнинг бу борадаги фикрлари баён этилади.

"Агарда инглиз футболини бир баланд иншоат деб ҳисоблайдиган бўлсак, унинг энг тепасида, шубҳасиз, "Манчестер Юнайтед" ҳамда "Ливерпуль" туради. Мен "Ливерпул"га ҳурматни сақлаган ҳолда айтишим керакки, "МЮ"нинг умумий мавқейи дунё миқёсида "Ливерпул"никидан кўра баландроқ. Шундай экан, сотувга келганда, харидорлар, аввало, "МЮ"га эътибор қаратишади деб ўйлайман. Манчестер жамоаси сотилмагунига қадар, "Ливерпуль" кутиб туришга мажбур бўлади. Мабодо, дунёнинг қайсидир чеккасида "Ливерпул"нинг ўта бой бўлган янги харидори чиқиб қолмаса, албатта.

Мени тарафкашликда айбламанг. Ҳа, мен "МЮ"чиман. Аммо сиз ҳам ҳар икки клубни мулк сифатида, иқтисодий жиҳатдан олиб қараганингизда, "МЮ"ни танлаган бўлардингиз. Биламан, ҳозирда "Ливерпул"нинг даражаси ва мавқейи баландроқ. Лекин сиз "Манчестер Юнайтед"нинг кўламини кўздан қочирмаслигингиз керак. Айтганимдек, молиявий жиҳатдан "МЮ", харидорлар учун фойдалироқ танлов бўлади. Менимча, ҳар икки клуб ҳам майдонда ва унинг ташқарисида бирдек даражада турса, "МЮ"нинг салобати яққол намоён бўлади".

Элсатиб ўтамиз, "МЮ" учун кўплаб бойлар қизиқиш билан қарамоқда. Улар ичида Буюк Британиянинг машҳур кишиси Сер Жим Рэтклифф, "ZARA" асосчиси Амансио Ортега ҳамда "Apple" компанияси мавжуд.

ИСМАТОВ Ж.