Angliyaning "MYU" va "Liverpul" klublari so‘nggi haftalar davomida o‘zlarining amerikalik egalari tomonidan sotuvga qo‘yildi. Endilikda, ushbu jamoalarga yangi xaridor chiqishi kerak. Yaqin yillar davomida "MYU"ga qaraganda, "Liverpul"ning muvaffaqiyatlari ko‘proq edi. Yurgen Klopp jamoani ko‘p narsaga erishtirdi. Shunga qaramay, sobiq "MYU" futbolchisi Gari Nevill "Liverpul"ni mahsulot sifatida ikkinchi o‘ringa qo‘yadi. Uning fikriga ko‘ra, ehtimoliy xaridorlar, avvalo, "MYU"ga e’tibor qaratishadi. Quyida Nevillning bu boradagi fikrlari bayon etiladi.

"Agarda ingliz futbolini bir baland inshoat deb hisoblaydigan bo‘lsak, uning eng tepasida, shubhasiz, "Manchester Yunayted" hamda "Liverpul" turadi. Men "Liverpul"ga hurmatni saqlagan holda aytishim kerakki, "MYU"ning umumiy mavqeyi dunyo miqyosida "Liverpul"nikidan ko‘ra balandroq. Shunday ekan, sotuvga kelganda, xaridorlar, avvalo, "MYU"ga e’tibor qaratishadi deb o‘ylayman. Manchester jamoasi sotilmaguniga qadar, "Liverpul" kutib turishga majbur bo‘ladi. Mabodo, dunyoning qaysidir chekkasida "Liverpul"ning o‘ta boy bo‘lgan yangi xaridori chiqib qolmasa, albatta.

Meni tarafkashlikda ayblamang. Ha, men "MYU"chiman. Ammo siz ham har ikki klubni mulk sifatida, iqtisodiy jihatdan olib qaraganingizda, "MYU"ni tanlagan bo‘lardingiz. Bilaman, hozirda "Liverpul"ning darajasi va mavqeyi balandroq. Lekin siz "Manchester Yunayted"ning ko‘lamini ko‘zdan qochirmasligingiz kerak. Aytganimdek, moliyaviy jihatdan "MYU", xaridorlar uchun foydaliroq tanlov bo‘ladi. Menimcha, har ikki klub ham maydonda va uning tashqarisida birdek darajada tursa, "MYU"ning salobati yaqqol namoyon bo‘ladi".

Elsatib o‘tamiz, "MYU" uchun ko‘plab boylar qiziqish bilan qaramoqda. Ular ichida Buyuk Britaniyaning mashhur kishisi Ser Jim Retkliff, "ZARA" asoschisi Amansio Ortega hamda "Apple" kompaniyasi mavjud.

ISMATOV J.