Мамлакатимизнинг энг иқтидорли дарвозабонларидан бири, «Машъал» футбол клубининг асосий посбони Санжар Қувватов шу йил уйланмоқчи эканлигини айтиб ўтди. Бизга маълум бўлишича, Қувватов никоҳ тўйини 4 ноябрга белгиламоқчи. Лекин ҳали бу борада якуний қарорга келгани йўқ. Сабаби олий лигада охирги тур ўйинлари 7 ноябрга белгиланган. Агар Қувватов 4 ноябрь куни уйланадиган бўлса, 7 ноябрь кунги «Машъал» - «Бунёдкор» баҳсида майдонга туша олмаслиги мумкин.

Албатта, «Бунёдкор»дек кучли рақибга қарши ҳар қандай футболчи тўп суришни хоҳлайди ва Санжар ҳам бундан мустасно эмас. Шу боис истеъдодли дарвозабон ҳозирча иккиланиб турибди. Биз Санжардан бўлажак келиннинг кимлиги ва нима иш қилиши билан қизиққанимизда, Қувватов мийиғида кулиб «У шоу-бизнес вакиласи» дея жавоб берди, аммо кимлигини айтмади. Натижада агар шоу-бизнес вакиласи бўлса, демак ё актриса ёки санъаткор бўлса керак деган ўйга бордик. Нима бўлган тақдирда ҳам Санжар Қувватовнинг келажакдаги ишларига ривож тилаб қоламиз.