Роберто Мартинес кетганидан сўнг Бельгия терма жамоаси бош мураббийи лавозимига Тьерри Анри ва Венсан Компани даъвогарлик қилмоқда, деб хабар беради RTBF.

1 декабрь, пайшанба куни терма жамоа ЖЧ-2022дан чиқиб кетганидан сўнг Мартинес терма жамоадаги фаолиятини якунлаганини эълон қилди. Анри турнирда Мартинеснинг мураббийлар штабида эди. Компани Бельгиянинг собиқ сардори бўлиб, футболчи сифатида миллий терма жамоа сафида 89 та ўйинда 4 та гол урган. Ҳозир у Англиянинг “Бёрнли” жамоасини бошқаради.

Шунингдек, ҳозирда “Монако”да ишлаётган Филипп Клеман Бельгия терма жамоаси бош мураббийлигига даъвогарлик қилмоқда.

Роберто Мартинес Белгия терма жамоасини 2016 йилнинг август ойидан буён бошқариб келаётган эди, унинг қўл остида жамоа 2018 йил Россияда бўлиб ўтган жаҳон чемпионатида учинчи ўринни эгаллаган. Қатарда бўлиб ўтган ЖЧ-2022да бельгияликлар 3 та ўйинда 4 очко жамғариб, “F” гуруҳида учинчи ўринни эгаллади ва плей-офф босқичига чиқа олмади.