Roberto Martines ketganidan so‘ng Belgiya terma jamoasi bosh murabbiyi lavozimiga Tyerri Anri va Vensan Kompani da’vogarlik qilmoqda, deb xabar beradi RTBF.
1 dekabr, payshanba kuni terma jamoa JCH-2022dan chiqib ketganidan so‘ng Martines terma jamoadagi faoliyatini yakunlaganini e’lon qildi. Anri turnirda Martinesning murabbiylar shtabida edi. Kompani Belgiyaning sobiq sardori bo‘lib, futbolchi sifatida milliy terma jamoa safida 89 ta o‘yinda 4 ta gol urgan. Hozir u Angliyaning “Byornli” jamoasini boshqaradi.
Shuningdek, hozirda “Monako”da ishlayotgan Filipp Kleman Belgiya terma jamoasi bosh murabbiyligiga da’vogarlik qilmoqda.
Roberto Martines Belgiya terma jamoasini 2016 yilning avgust oyidan buyon boshqarib kelayotgan edi, uning qo‘l ostida jamoa 2018 yil Rossiyada bo‘lib o‘tgan jahon chempionatida uchinchi o‘rinni egallagan. Qatarda bo‘lib o‘tgan JCH-2022da belgiyaliklar 3 ta o‘yinda 4 ochko jamg‘arib, “F” guruhida uchinchi o‘rinni egalladi va pley-off bosqichiga chiqa olmadi.
