Diario Sport xabariga ko‘ra, "Manchester Yunayted" 15 yoshli Jey Jey Gabriel klubni yaqin vaqt ichida tark etish haqidagi qarorini o‘zgartirmasligiga ishonmoqda.
Bundan tashqari, angliyalik qanot hujumchisi faoliyatini Ispaniyada davom ettirishga qaror qilgan. Bu holat unga jiddiy qiziqish bildirayotgan "Barselona" va "Real Madrid"ning imkoniyatlarini oshirmoqda, "Bavariya" va "PSJ"ni esa nisbatan noqulay vaziyatga tushirmoqda.
Gabriel agenti Ali Barat boshchiligida deyarli barcha da’vogar klublar bilan muzokara o‘tkazib, kelajagi uchun eng maqbul variantni tanlamoqda.
Yosh futbolchi yaqinda ehtimoliy transferni muhokama qilish uchun "Barselona"ga tashrif buyurdi. Ayni paytda kataloniyaliklarning azaliy raqibi "Real Madrid" ham anchadan buyon uning transferi ustida ishlab kelmoqda. Shu tariqa, ikki ispan grandi o‘rtasida Gabriel uchun jiddiy raqobat yuzaga kelgan.
Gabrielning "Barselona"ga alohida mehri borligi aytilmoqda. Shunga qaramay, kataloniyaliklar "Real Madrid"ning unga bo‘lgan qiziqishini jiddiy xavf sifatida baholamoqda.
