64 кг. вазн тоифасидаги боксчимиз Ўктамжон Раҳмонов эквадорлик рақибига қарши чиройли жанг ўтказиб, ғалабага эришди. 1/16 финал босқичида Андерсен Рояс-Мина юртдошимизга муносиб қаршилик кўрсатишга уринди.

Жанг бошида Раҳмонов рақибини ўрганишга ҳаракат қилди ва ўзининг тактикаси орқали очко олишни бошлади. Аммо раунд якунида эквадорликдан зарбалар сериясини ўтказиб юборди. Натижада биринчи раунддан кейин ҳисоб — 5:4.

Иккинчи раунд бошида Ўктамжон бехосдан рақибнинг белидан пасига зарба бериб юборди. Ҳакам дастлаб вазиятни яхши тушунмади шекилли, Рояс-Мина нокдаунга учради дея, ҳисобни очди. Ундан кейин эса ҳамюртимиздан очко олиб ташлади. Бундай ҳолатда рақибга 2 очко қўшиб берилади. Бу ҳолат Раҳмоновнинг жаҳлини чиқарди ва фаолликни оширди. Иккинчи раундда ҳам 5:4 ҳисоби қайд этилди ва икки раунд якунига кўра 10:8га етди.

Учинчи раундда Ўктамжон янада чиройли ҳаракат қилиб, рақибини росманасига нокдаунга туширди. Рақиб боксчиси шундан кейин ўзига кела олмади ва спортчимиз бир нечта зарбаларни аниқ бера олди. Якуний ҳисоб — 16:10. Ўктамжон Раҳмонов нимчорак финалга чиқди.

Бокс. 64 кг. 1/16 финал
Ўктамжон Раҳмонов (Ўзбекистон) - Андерсен Рояс-Мина (Эквадор) - 16:10 (5:4, 5:4, 6:2)