Англия терма жамоаси ҳимоячиси Жон Стоунснинг ҳужумчи Эрлинг Холанд "Манчестер Сити" учун қанчалик муҳим бўлса, Кейн Англия учун шунчалик муҳим эканлигини таъкидлади.
“Бу икки ўйинчига ўхшаган футболчилар ҳар доим ўз фазилатларини кўрсатишади. Уларнинг иккаласи ҳам ақл бовар қилмайдиган футболчилар. Харри билан ўйнаш ҳар доим ёқимли бўлган ва ишончим комилки, у тез орада рекордлар жадвалига киради", - дея Стоунснинг сўзларини келтиради The Independent.
Кейн 2022 йилги жаҳон чемпионатида Англия терма жамоаси сафида ҳали гол ура олмади, аммо учта голли узатмани амалга оширди.
Инглизлар учта ўйинда 7 очко жамғариб, “B” гуруҳида биринчи ўриндан турнирнинг плей-офф босқичига йўл олди. Улар Сенегал билан тўқнаш келади.
