Бутса, футболка ва либосларни эсдан чиқара туринг. Бугун оёқ ҳимоясида ишлатиладиган "щит" ҳақида гаплашамиз. Англия, Испания, Германия ва Бразилия каби давлатлар шарафини ҳимоя қилаётган юлдузлар, ўз миллати, оилалари ва клубларига бағишланган махсус дизайндаги оёққалқондан фойдаланмоқда. Ўтмишда, масалан, Роналдунинг ўзи ва рафиқаси расми туширилган ҳимоя воситасидан фойдаланганини кўрганмиз. Қуйида шу ҳақида гап боради.
Букайо Сака
Букайо Саканинг "биринчи муҳаббати", шубҳасиз, "Арсенал"дир. Аллақачон учта гол уришга улгурган Англия ҳужумчиси оёғида "Арсенал" рамзи туширилган ҳимоя воситасини тақиб олган. Унинг устида еттинчи рақам ёзилган. Албатта, бу рамзни Саканинг терма жамоадаги шериклари бўлган Кейн ва Дайер кўришни истамаган бўларди.
Рафинья
Камерунга қарши ўйинда захирага олинган Рафинья, ўриндиқда оёғини кўрсатади. Унда футболчининг ўз расми туширилган эди. У Бразилия терма жамоаси либосида. Ҳимоя воситаси тепасига эса португал тилида "Кубокни ўз уйига келтиринглар" деб ёзилган.
Дани Карвахал
Испания кутилмаганда Марокашга ютқазиб қўйган эди. Бу ҳодиса жамоа аъзоси бўлган Карвахалга ҳам ёмон таъсир қилган аниқ. Аммо ҳимоячи ўз ватанини севади. Унинг оёққалқонида ўз расми туширилган бўлиб, унда "Реал" ва миллий терма жамоа либосида тасвирланган.
Юссуфа Мукоко
18 ёшли "Боруссия Дортмунд" ҳужумчиси Германия ўз уйига қайтишидан олдин фақат бир марта майдонга туширилганди. Мукоко фойдаланган оёққалқонда унинг "BVB" либосида тушган анимацион расми бор. Унинг устига эса инглиз тилида "Сизни яхши кўраман онажон" деб ёзилган.
Гарет Бэйл
Уэльснинг афсонавий футболчиларидан бири бўлган Бэйл ортиқча зебни ёқтирмайди. Шундайин, унинг оёққалқони ҳам оддий. Унда мамлакат байроғи рамзи туширилган.
ИСМАТОВ Ж.
