Аргентина терма жамоаси ҳужумчиси Лионель Месси Нидерландияга қарши жаҳон чемпионати чорак финал учрашувида пенальтини голга айлантирди. 35 ёшли ҳужумчи 24 учрашувда жаҳон чемпионатидаги 10-голини урди. Бу кўрсаткич бўйича у Аргентина терма жамоасининг турнирдаги энг яхши тўпурари, 12 учрашувда 10 та гол урган Габриэль Батистутага етиб олди.
Шунингдек, жаҳон чемпионатида 10 та голни Хельмут Ран (10 та ўйин, Германия), Гари Линекер (12, Англия), Теофило Кубильяс (13, Перу), Томас Мюллер (19, Германия), Гжегож Лато (20, Польша) киритган.
Эслатиб ўтамиз, ўша учрашувда Месси жаҳон чемпионатларидаги еттинчи голли узатмани амалга оширди. У бу кўрсаткич бўйича иккинчи қаторни бўлишиб турибди, энг яхшиси Диего Марадона (8).
