Мадриднинг “Реал” клуби “Палмейрас” ҳужумчиси Эндрик билан шартнома имзолаганини эълон қилди.
Клуб матбуот хизмати хабарига кўра, 16 ёшли футболчи 2024 йилнинг июль ойида вояга етгач, "Реал"га ўтиши мумкин бўлади. Унгача Эндрик "Палмейрас"да ўйнашда давом этади.
Олдинроқ инсайдер Фабрицио Романо ҳужумчи мадридликлар клуби билан 2027 йилгача шартнома имзолагани ва яна 3 йилга узайтирилиши мумкинлиги ҳақида хабар берган эди. “Қаймоқранглилар” футболчи учун 72 миллион евро тўлаган, шундан 12 миллиони бонуслар эди.
Эндрик “Палмейрас” сафида 2022 йилнинг июлидан буён тўп суради ва Бразилия клуби сафида 16 та ўйинда майдонга тушиб, 9 та гол урди ва битта голли узатмани амалга оширди.