Франциялик 24 футболчининг барчаси ЖЧ-2022 финалида Аргентина билан ўйнашга тайёр.
RMC Sport хабарига кўра, Франция терма жамоасида янги вирус юқтириш ҳолатлари қайд этилмаган. Ҳимоячилар Рафаэль Варан ва Ибраҳима Конате, шунингдек, аввалроқ касал бўлиб қолган вингер Кингсли Команнинг аҳволи яхши. Кеча улар Франция терма жамоасининг умумий гуруҳида машғулотлар олиб боришди.
Жума кунги йиғинни ўтказиб юборган Тео Эрнандес ва Орельен Тчуамени ҳам машғулотларда иштирок этишди.
Оливье Жиру тиззасидаги муаммоларга қарамай, ЖЧ-2022 финалида ўйнашга тайёр. У мавсум бошида ўтказилган кўп сонли ўйинлар билан боғлиқ енгил ноқулайликни бошдан кечирмоқда. Яна бир қанча француз футболчилари бу муаммога дуч келишган, аммо бу уларнинг ҳаммасини майдонга тушишига тўсқинлик қила олмайди.
Шанба куни барча 24 нафар франциялик футболчи умумий гуруҳда машғулот ўтказди.
